Өзбекстандыктар унаасыз жүрмөй болушту

Өзбекстандыктар унаасыз жүрмөй болушту
11-Сен. 2018, Шейшемби, 12:27

Өзбекстандыктар айына бир күн жөө жүрүүлөрү мүмкүн. Тактап айтканда, ар бир айдын үчүнчү жумасы «Унаасыз күн» деп жарыяланат.

Ички иштер министирлигинин бул акциясын өкмөт колдоого алды. Тажрыйба катары сентябрь айынын аягында атайы акция уюштурулат. Өзбекстандагы мыйзам чыгаруу палатасынын депутаттары да унааларын токтотуп, эл менен бирге бир күн коомдук транспорт менен каттоого даяр. Бул акция элдин колдоосуна алынса, бул күнгө атайы статус да берилет.

Экономикасы өсүп келе жаткан кошуна өлкөдө жыл сайын унаалардын саны да өсүп келүүдө. Ташкенттин өзүндө гана миллонго жакын унаа бар. Башка өлкөлөр сыяктуу өзбекстандыктар да кээде унаа токтотууга жер таппай кыйналышат.

«Бийлик эч кимди унаасыз жүр деп мажбурлабайт. Ар бир жарандын өз эрки. Бул жерде жөн гана элдин активдүүлүгү менен табиятка деген камкор мамилесин ойготуу», - дейт мыйзам чыгаруу палатасынын депутаты.

Жалпы Өзбекстанда шаршемби күнү «Өрткө каршы күрөшү» күнү деп белгиленген. Ал эми бейшембиде профилактикалык иш-чаралар жүргүзүлөт. Эми ар бир айдын үчүнчү жумасында жалпы журт машинасын таштап коомдук унаа менен жүрүшмөкчү.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!