Мамлекеттик карыз 4,16 млрд. долларга жетти
Кыргызстандын ички, тышкы карызы 2017жылдын биринчи кварталында 95,4 млн. долларга көбөйдү. Бул тууралуу Каржы министрлигинин борбордук казналыгы билдирди.
Маалыматка караганда, үстүбүздөгү жылдын ичинде мамлекеттик карыз 4 млрд. 160,83 млн. долларга жетти.
Жылдын алгачкы 3 айында өскөн карыздын 61,2 миллиону сырткы карыз. Тактап айтканда, сырткы карыздын көлөмү 3 млрд 804 млн. долларга жетти. Анын 1.55 млрд. доллары Кытайдын Эксим банкынан алынган, Дүйнөлүк банкка 623 млн., Азия өнүктүрүү банкынан 573 млн., JICA уюмунан 246 млн. , Россиядан 240 млн. жана Эл аралык валюта фондуна 187 млн. доллар алынган.
Ал эми ички карыздын көрсөткүчү 34,3 млн. долларга өсүп, 357 млн. долларга жетти.
31-мартка карата мамлекеттин карызы Ички дүң өндүрүмдүн 57,7 пайызына барабар болгон.