Европа банкы 4 миллион евро насыя берет

Европа банкы 4 миллион евро насыя берет
2-Авг. 2018, Бейшемби, 16:04

Президент Сооронбай Жээнбеков «Кыргызстан менен Европа реконструкциялоо жана өнүктүрүү банкынын ортосундагы Кредиттик макулдашууну жана "Чыгышэлектр" ачык акционердик коомунун жана Европа реконструкциялоо жана өнүктүрүү банкынын ортосундагы Европа реконструкциялоо жана өнүктүрүү банкынын уюштуруучуларынын атайын фондунун каражаттарынын эсебинен "Чыгышэлектр" ачык акционердик коомун реабилитациялоо долбоору үчүн берилүүчү инвестициялык грантка карата гранттык макулдашууну ратификациялоо жөнүндө» мыйзамга кол койду. Бул тууралуу бүгүн, 2-августта президенттик аппараттан маалымдашты.

Маалыматка ылайык, «Чыгыш электр» ААКсы бөлүштүрүүдө 20% чейин жеткен өтө көп жоготууларды кошкондо төмөн эксплуатациялык мүнөздөмөгө ээ, ошондой эле эски жабдуунун иштөөсүнүн техникалык мөөнөтү аяктагандан кийин да иштешине байланыштуу үзгүлтүктөр көп. Аба чубалгыларынын көбү 1960-1970-жылдары аз чыңалууга ылайыкталып курулуп, учурдун талаптарына жооп бербейт.

Ошол себептен 2017-жылдын 7 декабрында Кыргызстан жана Европа реконструкциялоо жана өнүктүрүү банкынын ортосунда «Чыгыш электр» ААКсын жаңыртуу долбоору үчүн кредиттик жана гранттык макулдашууларга кол коюлган.

Макулдашуунун негизинде ЕРӨБ 6 млн. евро каражатын берет. Анын 4 миллиону — кредит, 2 млн. евросу — грант.

Мындан тышкары Кыргызстандын долбоорунун алкагында долбоорду ишке ашырууга жана корпоративдик өнүктүрүү программасын киргизүүгө колдоо көрсөтүү түрүндө 1 млн еврого жакын техникалык жардам көрсөтүлөт.

Мыйзам расмий жарыяланган күндөн тартып он күн өткөндөн кийин күчүнө кирет.

Эскерте кетсек, мыйзам Жогорку Кеңеши тарабынан 28-июнда кабыл алынган.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!