Кыргызстандын туусун Оңолбек Каныбек улуу көтөрүп чыгат

Кыргызстандын туусун Оңолбек Каныбек улуу көтөрүп чыгат
7-Авг. 2018, Шейшемби, 14:52

Индонезияда өтүүчү XVIII Азия оюндарынын ачылышында Кыргызстандын туусун волейбол боюнча Кыргыз курамасынын капитаны Оңолбек Каныбек улуу көтөрүп чыгат. Бул тууралуу бүгүн, 7-августта президент Сооронбай Жээнбеков аталган мелдешке бара турган кыргызстандык спортчулар менен болгон жолугушуусунан кийин белгилүү болгонун президенттик аппараттан билдиришти.

Президент Эл аралык спорттук мелдешке татыктуу спортсмендерди тарбиялоого көп күч-аракет жумшаган машыктыруучу-устаттарга ыраазычылык билдирди.

«Ар бириңиздердин мээнетиңиздерди баалап, барктап алууга даярбыз. Мына бул силерге тапшыра турган өлкө Туусу мекендин деми, элдин руху, туулган жердин абасы-суусу. Ата-бабалардын мурасы болгон Кыргызстандын Кызыл Туусун бийик көтөргүлө!», — деп белгилеп, Президент Сооронбай Жээнбеков Мамлекеттик тууну Кыргыз Республикасынын спорттук делегациясынын улуттук курама командаларынын капитаны Каныбек Жолчубековго тапшырды.

Каныбек Жолчубеков спортсмендердин атынан Мамлекет башчысына улуттук курама команданын футболкасы — символикалуу белекти тапшырды.


Кыргызстандын спортсмендерин XVIII Азия оюндарына узатуу аземинин соңунда спортчулар Президент менен эстеликке сүрөткө түшүштү.




Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!