Бишкекте электрондук патенттерди берүү башталды

Бишкекте электрондук патенттерди берүү башталды
8-Авг. 2018, Шаршемби, 10:22

Мамлекеттик салык кызматы Бишкек жана Ош шаарларынын аймагында ыктыярдуу, милдеттүү патент жана милдеттүү патент алууга тийиш болгон иш чөйрөсүндөгү жалданма жумушчуга электрондук форматтагы документ түрүндө (электрондук патент) патент берүүнү баштады. Бул тууралуу бүгүн, 8-августта өкмөттүн басма сөз кызматынан кабарлашты.

2018-жылдын 1-октябрынан баштап Кыргызстандын калган аймактарында электрондук форматтагы патент берүү башталат.

Электрондук патенттерди берүү салык төлөөчүлөрдүн патент алууга убакыт коротуусун кыскартууга багытталган.

Белгилей кетчү жагдай, салык төлөөчүлөр патенттерди өз тандоосу боюнча: мурдагыдай кагаз түрүндө же электрондук форматта ала алышат.

Эскерте кетсек, 2018-жылдын 1-31-июлунда Бишкек жана Ош шаарларынын аймагында электрондук форматтагы патент берүү сынак долбоору өткөн.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!