Японияда Айтматовго арналган семинар өттү

Японияда Айтматовго арналган семинар өттү
14-Авг. 2018, Шейшемби, 15:11

Кыргыз Республикасынын Япониядагы элчилиги аталган өлкөнүн Эл аралык Социалдык клубунун өкүлдөрүнө кыргыз жазуучусу Чыңгыз Айтматовдун 90-жылдыгына арналган семинар өткөрдү. Бул тууралуу Тышкы иштер министрлигинин маалымат кызматы кабарлады.

Иш-чарада Айтматовдун сүрөттөрү жана япон тилине которулган китептери тааныштырылды.

КРнын Япониядагы элчиси Чыңгыз Айдарбеков эки тараптуу мамилелердин жетишкендиктери жана ушул жылда өткөрүлө турган иш-чаралар тууралуу маалымдады.

Эки тараптуу натыйжалуу иш-аракеттердин жыйынтыгы боюнча III Дүйнөлүк Көчмөндөр оюндарына сумо спортсмендери, кол-күрөш жана башка күрөштөр боюнча спортсмендерден жана судьялардан турган көп сандагы япон делегациясынын катышуусу, ошондой эле Япониянын музыканттары жетектеген ансамблинин келиши күтүлүүдө.

Кыргызстанга баруу сунушун катышуучулар ыраазачылык менен кабыл алышты.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!