Жээнбеков: ​“Кооперативдердин келечеги кең”

Жээнбеков: ​“Кооперативдердин келечеги кең”
16-Авг. 2018, Бейшемби, 10:22

Президент Сооронбай Жээнбеков кечээ, 15-августта Ош жана Жалал-Абад облустарына эки күндүк иш сапарынын алкагында Ноокен районунун Кочкор-Ата шаарында Жалал-Абад облусунун жашоочулары менен жолугушуу учурунда.“Региондорду өнүктүрүүдө кооперативдердин келечеги кең”, -деп айтты. Бул тууралуу президенттик аппараттан кабарлашты.

Мамлекет башчысы жакында “Кооперативдер жөнүндө” мыйзамга кол коюлгандыгын эске салды.

“Аймактарды өнүктүрүүдө кооперативдерди түзүү зор роль ойнойт. Бул мыйзамда айыл чарба кооперативдерин өнүктүрүү багытында жакшы шарттар түзүлгөн”, -деп баса белгиледи Жээнбеков.

Эске салсак, Мыйзам Жогорку Кеңеш тарабынан 28-июнда кабыл алынып, “Кооперативдер жөнүндө” колдонуудагы мыйзамдын айрым кенемтелерди толуктоо максатында иштелип чыккан.

Кабыл алынган мыйзам кооперативдердин кеңешинин ишин жакшыртууга, кооперативдердин ишиндеги ички карама каршылыктарды жана кызыкчылыктардын кагылышын жоюуга мүмкүнчүлүк берет.

Республикабызда кооперативдик системаны өнүктүрүү айыл чарба өндүрүүчүлөрүнүн экономикалык мүмкүнчүлүктөрүн, атаандашуу жөндөмдүүлүктөрүн арттырууда, чарба жүргүзүүнүн шарттарын жакшыртууда, өлкөнүн азык-түлүк коопсуздугун камсыз кылуу проблемаларын чечүүдө жана товардык продукциянын өсүшүнө өбөлгө түзүүдө өзгөчө роль ойнойт.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!