Президент: "Кыргыздар үчүн Алтай темасы символикалуу мааниге ээ"

Президент:
27-Авг. 2018, Дүйшөмбү, 11:16

Бүгүн, 27-августта Бишкекте өтүп жаткан Алтай тектүү элдердин тарыхын жана маданиятын изилдөөчүлөрүнүн эл аралык 61-туруктуу конференциясынын ачылыш аземинде президент Сооронбай Жээнбеков Алтай мурасына, тарыхы менен маданиятына кызыгуу жогору экенин айтты.

Мамлекет башчысы конференциянын катышуучуларынын алдында сүйлөп жатып, мамлекет башчысы аларга «кыргыз жергесине кош келиңиздер» деп жылуу саламдашты.

"Бүгүнкү конференциянын ишине Батыш менен Чыгыштын көрүнүктүү жана абройлуу окумуштары катышып отурасыздар. Алтай тектүү элдердин тарыхын жана маданиятын изилдөөчүлөрдүн эл аралык туруктуу конференциясы дүйнөнүн булуң-бурчунан илимпоздорду чогулткан эл аралык аянтча болуп эсептелет. Бул конференция алтымыш жыл мурда, 1957-жылы Мюнхен шаарында болуп өткөн 24-эл аралык чыгыш таануучулар конгрессинин чечими менен түзүлгөн. Ошондон бери алтай таануучулардын эл аралык конференциясы жыл сайын өтүп келиши Алтай мурасына, тарыхы менен маданиятына кызыгуунун жогору экенин билдирет", - деди Жээнбеков.

Ал Берлин университетинин түрк таануу институтунун директору Барбара Кельнер-Хайнкелеге, конференциянын өткөн жылкы төрагасы венгриялык профессор Акош Апотоцкиге жана конференцияга катышып жаткан белгилүү Алтай таануучу илимпоздорго да ыразычылык айтты.

Ошондой эле ал эл аралык конференция илимпоздор үчүн Алтай цивилизациясына таандык элдердин мурасы, тили жана маданияты жөнүндө илимий изилдөөлөрдүн натыйжаларын талкуулап, пикир алмашууга мүмкүнчүлүк берет. Кыргыздар үчүн Алтай темасы символикалуу мааниге ээ экенин кошумчалады.

"Улуу Манас бабабыздын Алтайда төрөлүшү эле кыргыз баласынын жүрөгүндө Алтай тууралуу өзгөчө ыйык, өзүнө тарткан, тереӊ сезимдерди жаратат", — деп айтты Президент.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!