ДКОго 79 өлкөдөн 2 миңден ашык кайрылуу түштү

ДКОго 79 өлкөдөн 2 миңден ашык кайрылуу түштү
30-Авг. 2018, Бейшемби, 11:10

III Дүйнөлүк көчмөндөр оюндарынын (ДКО) спорттук оюндарына катышууга 79 өлкөдөн 2 миң 300 кайрылуу түштү. Бул тууралуу бүгүн, 30-августта аталган оюндардын катчылыгынан билдиришти.

Маалымат боюнча, каттоо 25-августта аяктаган. Расмий чакыруулар 102 өлкөгө жиберилген. Спорттук мелдештер эркектер арасында спорттун 37 түрү боюнча, аялдар арасында 16 түрү боюнча өткөрүлөт.

Айта кетсек, катышуучулар спорттун 37 түрүндө күч сынашат. Жалпы 549 медаль ойнотулат (174 алтын, 173 күмүш жана 247 коло). III Дүйнөлүк көчмөндөр оюндарынын жалпы байге фонду 26 миллион сомду түзөт. Оюндар 2-8-сентябрь аралыгында Ысык-Көл обулсунун Чолпон-Ата шаарында өтөт. Көчмөндөр оюнунун ачылыш аземи 2-сентябрда саат 20:00дө башталат. Жабылыш аземи 8-сентябрда саат 20:00дө болот.

Ал эми буга чейин Үчүнчү Дүйнөлүк көчмөндөр оюндарынын ачылыш аземине Азербайжандын, Казакстандын, Түркиянын, Өзбекстандын мамлекет башчылары, ошондой эле Венгриянын премьер-министри катышаары айтылган.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!