Президент Виктор Орбан менен эки тараптуу жолугушуу өткөрдү

Президент Виктор Орбан менен эки тараптуу жолугушуу өткөрдү
4-Сен. 2018, Шейшемби, 16:19

Президент Сооронбай Жээнбеков бүгүн, 4-сентябрда Чолпон-Ата шаарында Кыргызстанга расмий визит менен келген Венгриянын премьер-министри Виктор Орбан менен эки тараптуу жолугушуу өткөрдү. Бул тууралуу президенттик аппараттан кабарлашты.

Президент Сооронбай Жээнбеков меймандос кыргыз жергесинде Виктор Орбан менен дагы бир жолу жылуу учурашып, III Дүйнөлүк көчмөндөр оюндарынын ачылыш аземине жана Түрк тилдүү мамлекеттер кызматташтыгы кеңешинин Саммитине катышканы үчүн ага ыраазычылык билдирди.

Ал премьер-министр Виктор Орбандын Дүйнөлүк көчмөндөр оюндарына келгени анын кыргыз элине болгон жылуу жана боордоштук мамилесин күбөлөндүрүп турганын белгиледи.

Мамлекет башчысы Венгриянын премьер-министринин визити эки өлкө ортосундагы достук мамилелерди бекемдеп, эки тараптуу мамилелердин илгерилешине жаңы дем берерин баса белгиледи.

Эскерте кетсек, Виктор Орбан өзүнүн визитинин алкагында III Дүйнөлүк көчмөндөр оюндарынын ачылыш аземине жана Түрк тилдүү мамлекеттер кызматташтыгы кеңешинин Чолпон-Ата шаарында өткөн Саммитинин жыйынына, ошондой эле «Кырчын» капчыгайында этношаарчанын ачылышына мартабалуу Ардактуу мейман катары катышты.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!