Кыргызстан менен Кытайдын кызматташтыгы талкууланды

Кыргызстан менен Кытайдын кызматташтыгы талкууланды
7-Сен. 2018, Жума, 15:05

Президент Сооронбай Жээнбеков бүгүн, 7-сентябрда Кытайдын Борбордук аскер кеңешинин төрагасынын орун басары Сюй Цилянды кабыл алды. Бул тууралуу президенттик аппараттан кабарлашты.

Президент Кытай Кыргызстан үчүн жакын дос, ишенимдүү өнөктөш жана жакшы кошуна экенин белгиледи. Дипломатиялык мамилелер орногондон бери достук мамилелердин өнүгүшүнө жана өз ара пайдалуу кызматташтыкты жөнгө салууга багытталган көптөгөн эки тараптуу документтерге кол коюлган.

«Биз достук мамиледеги коңшубузга өлкөбүздүн өнүгүү жылдарында ар дайым колдоо көрсөтүп келгендигине ыраазычылык билдиребиз. Кытайга болгон акыркы сапарымда Стратегиялык өнөктөштүктүн ар тараптуу өнүгүүсү жөнүндөгү Биргелешкен декларацияга жана дагы эки тараптуу 10 документке кол коюлду. Биз Кытай менен кызматташууну мындан ары дагы өнүктүрүүгө даярбыз», — деп белгиледи Мамлекет башчысы.

Жолугушууда региондо коопсуздукту камсыз кылуу маселелери боюнча пикир алмашышты.

«Бул багытта Кыргызстан Кытай, ЖККУ жана башка коопсуздук жаатындагы кызматташуу маселелери боюнча эл аралык уюмдар менен биргеликте коркунучтарга жана чакырыктарга туруштук берүүгө даяр», — деп белгиледи президент.

Жээнбеков Кытайдын төрагасы Си Цзиньпинге салам жолдоп, аны 2019-жылы ШКУга мүчө-мамлекет башчыларынын Саммитинин алдында мамлекеттик визит менен чыдамсыздык менен күтүп жатканын белгиледи.

Кытай Борбордук аскер кеңешинин төрагасынын орун басары Сюй Цилян июнь айында Сооронбай Жээнбековдун КЭРге болгон мамлекеттик визитинин учурунда эки өлкөнүн Куралдуу күчтөрүнүн ортосундагы аскердик-техникалык кызматташтыкты тереңдетүү, аны жаңы деңгээлге көтөрүүгө багытталган келишимдерди ишке ашырууну өзүнүн визитинин максаты экенинин билдирди.

Сюй Цилян Кытайдын төрагасы Си Цзиньпинь президент Сооронбай Жээнбековго ысык салам айттырганын белгиледи.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!