​Дүйнөлүк көчмөндөр оюндарынын логотиби өзгөрүүсүз калат

​Дүйнөлүк көчмөндөр оюндарынын логотиби өзгөрүүсүз калат
8-Сен. 2018, Ишемби, 12:54

Дүйнөлүк көчмөндөр оюндары кайсы жакта өтпөсүн логотиби өзгөрүүсүз калат. Бул тууралуу бүгүн, 8-сентябрда жыйынтыктоочу маалымат жыйынында Туризм департаментинин директору Азамат Жаманкулов билдирди.

Анын айтымында караганда, көчмөндөр оюнун логотибине Кыргызстан ээ болуп эсептелет жана ал патенттелген. Көчмөндөр оюндарын өткөрө турган бардык өлкөлөр бул логотипти колдонууга уруксат сурашы керек болот. Оюндар каякта өтпөсүн, логотиби өзгөрүүсүз калат. Бирок, сырткы бөлүгүн өзгөрткөнгө болот. Ал эми логотип өзү ДКОнун символу бойдон калат.

"Бул логотип Дүйнөлүк көчмөндөр оюндарынын расмий символу бойдон калат", - деди Жаманкулов.

Айта кетсек, Көчмөндөр оюндарынын логотибинин автору - Майрамкул Асаналиев аттуу сүрөтчү.

Үчүнчү Дүйнөлүк Көчмөндөр оюнунун жабылыш аземи бүгүн, 8-сентябрда саат 20:00дө Чолпон-Атадагы ат майданда өтөт. Жабылыш аземине алыскы жана жакынкы чет мамлекеттен ырчылар келет. Айта кетсек, Көчмөндөр оюндарынын жабылыш аземине Германиянын Чыңгыз хан тобу, франциялык ырчы Мурад Бурауи, Эквадордон Лео Рохас, россиялык "Корни" тобу, Румыниядан "Аксент" тобу, өзбекстандык ырчы Озода Нурзаидова, Казакстандан Жанар Дугалова жана Кыргызстандан Гүлнур Сатылганова, Мирбек Атабеков жана башка кыргыз ырчылары катышат.

2-сентябрда башталган бул оюнга 70 мамлекеттен үч миңге жакын спортчу келип, спорттун 37 түрү боюнча күч сынашты.

Ушуну менен Кыргызстан бул оюнду өлкөдө үчүнчү ирет өткөрдү. Эми IV Дүйнөлүк көмөндөр оюндары 2020-жылы Түркияда болот.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!