Финпол: кызматкерлер сый акыга 1 миң 400 доллар алышкан

Финпол: кызматкерлер сый акыга 1 миң 400  доллар алышкан
11-Сен. 2018, Шейшемби, 11:46

Экономикалык кылмыштарга каршы күрөшүү боюнча мамлекеттик кызматтын (Финансы полициясы) кызматкерлери Жаңы-Пахта айыл аймагынын жооптуу адамдарынын кызматтык абалынан кыянаттык менен пайдалануу фактысын аныкташканын “Zaman Kyrgyzstan” маалымат агенттигине кабарлады.

Анда айтылгандай, ыкчам-издөө иш-чараларын жүргүзгөндө Жаңы-Пахта айыл аймагынын кызматкерлери өздөрүнүн кызматтык абалынан кыянаттык менен пайдаланышып, белгиленген сый акыга (орточо эсеп менен 1 миң 400 АКШ доллары) Жер комиссиясынын протоколунун негизинде жеке турак жай куруу үчүн Жаңы-Пахта айылында жайгашкан жер участокторун бир нече жолу беришкендиги аныкталган. Жогоруда аталган Жер участокторун берүү жөнүндө чечим айыл өкмөтүнүн жооптуу адамдары тарабынан Кыргыз Республикасынын Өкмөтүнүн 2005-жылдын 6-майындагы №177 токтому менен бекитилген Жеке турак жай куруу үчүн жер участокторун берүү тартиби жөнүндө Жобонун 16-пунктунун талаптарын бузуп чыгарылып, жерлер кезексиз берилген.

Муну менен бирге Сокулук районунун Жерге жайгаштыруу жана кыймылсыз мүлккө укуктарды каттоо боюнча башкармалыгынын пландык-картографиялык материалдарына ылайык берилген участоктор айыл чарба багытындагы жерлер категориясына кирип, жайыт катары пайдаланышы керек болчу жана жеке менчикке берилбеши керек. Бул факт боюнча Сокулук районунун прокуратурасы тарабынан Кылмыш-жаза кодексинин 304 (кызматтык абалынан кыянаттык менен пайдалануу), 305-2 (Кыргыз Республикасынын жер мыйзамдарын бузуу), 350 (документтерди жасоо) жана 313-1-беренелеринде (пара алуу) каралган кылмыштардын белгилери боюнча кылмыш иши козголду. Азыркы убакта тергөө иштери жүрүп жатат.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!