Албек Ибраимовдун соттук иши жылдырылды

Албек Ибраимовдун соттук иши жылдырылды
12-Сен. 2018, Шаршемби, 14:39

Бүгүн, 12-сентябрь күнү Бишкек шаардык сотунда Албек Ибраимовдун баш коргоо чарасын кароого байланышкан соттук иш жылдырылды.

Ибраимовдун жактоочусу Сергей Слесарев маалымдагандай, соттук отурумду жабык өткөрүү чечими кабыл алынган. Мында соттук отурумга айыпталуучунун адвокаты гана кирмек. Бирок, чечимге айыпталуучунун тарапташтарында нааразычылык пайда болду. Жыйынтыгында соттук отурум 17-сентябрь күнү саат 10:00гө белгиленди.

27-августта Бишкек шаарынын мурунку мэри Албек Ибраимовдун абактагы мөөнөтүн узартуу боюнча иши Биринчи Май райондук сотунда каралып, судья Эмилбек Каипов анын камактагы мөөнөтүн 28-октябрга чейин узартуу өкүмүн чыгарган.

УКМКнын расмий айыптоосуна таянсак, кылмышка шектүү катары кармалып жаткан Албек Ибраимов ТНК “Дастан” ААК башкармалыгынын төрагасы болуп турган учурда ТНК “Дастан” ААК коргонуу каражаттарын сатып алуу боюнча ири контрактка келишим түзүү үчүн сатуучудан сый акы катары 270 000 АКШ доллар алган.

Мындан сырткары Кылмыш-жаза кодексинин 171-беренеси боюнча козголгон дагы бир кылмыш иши тергөлүүдө, анын алкагында “Солнечный берег” пансионаттын ААК 100 пайыз акция пакетин сатуу аркылуу ТНК “Дастан” ААК 152 млн сомдон ашык чыгым келтирилген.

Экс- мэр Албек Ибраимов 19-июлдан бери УКМКнын убактылуу кармоочу жайында жатат.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!