Өмүрбек Бабанов боюнча тергөө иши жүрүп жатат

Өмүрбек Бабанов боюнча тергөө иши жүрүп жатат
12-Сен. 2018, Шаршемби, 14:43

Жогорку Кеңештин экс-депутаты Өмүрбек Бабанов боюнча тергөө иши жүрүп жатат. Бул тууралуу бүгүн, 12-сентябрда Коопсуздук кеңешинин катчысы Дамир Сагынбаев маалымат жыйында билдирди.

Анын айтымына ылайык, тергөө иштеринин жыйынтыгы менен тийиштүү чаралар кабыл алынат.

Айта кетсек, былтыр 4-ноябрда Башкы прокуратура Жогорку Кеңештин депутаты Бабановго Кылмыш жаза кодексинин "конституциялык түзүмдү күч менен басып алууга чакырык жасоо жана улуттар аралык, расалык же диний кастыкты козутуу" беренелери боюнча кылмыш иши козгогон.

Бул боюнча аталган ведомство атайын билдирүү жарыялаган. Андагы маалыматка караганда, тергөөгө чейинки текшерүү иштеринин натыйжасында Бабанов президенттик кызматка талапкер катары шайлоо алдындагы үгүт иштеринин жүрүшүндө, 2017-жылдын 28-сентябрында Ош шаарынын Амир Темир кичи районунун жашоочулары, негизинен өзбек тектүүлөр менен жолугушкан учурда алардын добушун алуу максатында өзбектердин укугу тебеленип жатканын, мамлекеттик органдар тараптан басымга кабылганын, улуттук теңсиздик бардыгын айтып, буга каршы жигердүү күрөшүүгө чакырганы аныкталганыдыгы жазылган.

Президенттик шайлоодон кийин Бабанов өлкөдөн чыгып кеткен жана ал 2017-жылдын 30-декабрында саясаттан биротоло кете турганын да коомчулукка жарыялаган. Ошол бойдон Кыргызстанга кайтып келе элек.




Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!