Бишкекте "АгроТехЭкспо-2018" көргөзмөсүнүн ачылышы болду

Бишкекте
14-Ноя. 2018, Шаршемби, 17:58

Биринчи вице-премьер-министр Кубатбек Боронов «АгроТехЭкспо-2018» айыл чарба техникаларынын көргөзмөсүнүн ачылышына катышты.

Өкмөттүн басма сөз кызматы кабарлагандай, Айыл чарбасынын потенциалын күчөтүү атамекендик агрардык тармакты өнүктүрүүнүн маанилүү маселелеринин бири болуп саналат.

«Евразиялык экономикалык бирлигине киргенден кийин дыйкан-фермерлерибиз үчүн кеңири базардын ачылышы менен кошо катуу атаандаштык да пайда болду. Буга байланыштуу биздин дыйкандардын жана кайра иштетүүчүлөрдүн жаңы технологияларды колдонуусу заман талабы болуп саналат. Биз өндүрүлгөн айыл чарба продукцияларынын сапаты жогору жана өздүк наркы төмөн болушуну жетишүүгө тийишпиз», – деп белгиледи биринчи вице-премьер-министр Боронов.

Анын айтымында, акыркы жылдары айыл чарбасын механизациялоо деңгээлин жогорулатуу боюнча зарыл чаралар көрүлүүдө.

«Бүгүнкү күндө өкмөт тарабынан кабыл алынган чечимдердин негизинде айыл чарба техникаларынын лизингин өнүктүрүү үчүн 800 млн. сомдон ашык акча каражаты “Айыл Банк” Ачык акционердик коомуна лизинг фондун түзүүгө берилди. Ошондой эле ЕврАзия өнүктүрүү банкынан 20 млн. доллары инвестициялык насыя тартылып, бүгүнкү күнү 14,6 млн. доллары өздөштүрүлдү. Ошону менен бирге жыл башынан бери Өкмөт тарабынан дагы 102,5 млн. сом дыйкандарга кымбат оруп жыюучу техникаларды, кубаттуу тракторлорду лизингке берүү үчүн бөлүндү», – деди биринчи вице-премьер-министр.

Боронов кошумчалагандай, өлкө аймагында 2020-жылга чейин Машина-трактордук станцияларды түзүү боюнча план иштелип чыккан. Бүгүнкү күнгө карата республика боюнча 71 МТС иштеп жатат, анын 15и 2018-жылы түзүлгөн.

Буга катар биринчи вице-премьер-министр белгилегендей, кыска мөөнөттөгү кабыл алынган чаралар жана бөлүнгөн каражаттардын көлөмү дыйкандардын айыл чарба техникасына карата муктаждыктарын толугу менен канааттандыра албайт.

Боронов ошондой эле өлкө аймактарында мындай көргөзмөлөрдү өткөрүү маанилүү экендигин белгиледи.

Белгилесек, «АгроТехЭкспо-2018» айыл чарба техникасы көргөзмөсүндө 20 өлкөнүн 30 компаниясынан келген өкүлдөр, ошондой эле республиканын булуң-бурчунан келген фермерлер жана дыйкандар катышууда.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!