Издөөдө жүргөн кыргызстандыктар ​кармалды

Издөөдө жүргөн кыргызстандыктар ​кармалды
10-Июль 2018, Шейшемби, 15:42

Мамлекет аралык издөөдө жүргөн кыргызстандыктар Москвада кармалды. Бул тууралуу ИИМдин басма сөз кызматынан билдиришти.

Маалыматка караганда, КРнын ИИМинин Россиядагы өкүлчүлүгү Россиянын ИИМинин аймактык бөлүктөрү менен биргеликте Москва шаары боюнча бир катар издөө иш-чараларын жүргүзүшкөн.

Анын жүрүшүндө уурулук боюнча изделип жаткан 1999-жылы төрөлгөн өзгөндүк жаран, алдамчылык боюнча изделип жаткан 1990-жылы төрөлгөн сокулуктук жаран, мүлктү өзүнө ыйгарып алуу же жок кылуу беренеси боюнча изделип жаткан 1984-жылкы оштук жаран, атайылап ден соолукка зыян келтирүү беренеси боюнча изделип жаткан 1987-жылы төрөлгөн оштук жаран кармалган.

Ошондой эле оор кылмыштары үчүн изделип жаткан 1979-жылкы (киши өлтүрүү), 1988-жылы төрөлгөн (зордуктоо), 1965-жылы төрөлгөн жаран (атайылап ден соолукка зыян келтирүү), 1985-жылкы жаран (алдын ала сүйлөшүлгөн адамдардын тобу менен тоноочулук) кармалган.

Учурда Минск конвенциясына ылайык, кармалгандарды экстрадациялоо боюнча маселе каралууда.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!