Өмүрбек Текебаев ооруканага жаткырылды

Өмүрбек Текебаев ооруканага жаткырылды
1-Авг. 2018, Шаршемби, 12:19

“Ата Мекен” социалистик партиясынын мурунку лидери, саясатчы Өмүрбек Текебаев 31-июлда Мирсаид Миррахимов атындагы улуттук кардиология борборуна жаткырылды. Бул тууралуу Жаза аткаруу кызматынын басма сөз кызматы кабарлады.

Маалыматка караганда, Өмүрбек Текебаев дарыгерлердин көрсөтмөсү менен ооруканага которулган.

Буга чейин айрым депутаттардан түзүлгөн комиссия камактагы саясатчы Текебаевдин ден-соолугу начарлап кеткенин айтып, дарыланууга муктаж экенин билдиришкен.

№47 абакта жаза мөөнөтүн өтөп жаткан Текебаев 2017-жылдын 26-февралында “Манас” эл аралык аэрапортунда Стамбул шаарынан учуп келгенде кылмышка шектүү адам катары кармалган. Ал 2010-жылы “Мегаком" компаниясын көзөмөлдөөгө кызыккан жактардан өтө ири өлчөмдөгү акча каражатын алуу болгон” деген жүйөө менен “коррупция” беренеси боюнча айып тагылып, Биринчи Май райондук сотунун судьясы Айбек Эрнис уулу сегиз жылга эркинен ажыраткан. Бул чечимди Шаардык, Жогорку сот да өзгөртүүсүз калтырган.

Бирок, Өмүрбек Текебаев өзүнө тагылган айыптоолорду “бийликтин саясий куугунтугу” катары сыпаттап келет.

Айтмакчы, аны менен бирге Дүйшөн Чотонов да камакка алынып, азыркы учурда Молдовановкадагы №27 абакта сегиз жылдык мөөнөтүн өтөп жатат.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!