Талапкерлер сынакты «Кыргызстест» аркылуу тапшырат

Талапкерлер сынакты «Кыргызстест» аркылуу тапшырат
18-Июль 2017, Шейшемби

Өкмөт президенттикке талапкерлердин «Кыргызтест» системасы боюнча мамлекеттик тилди билүү деңгээлин аныктоону караган токтом кабыл алды.

Өкмөттүн маалымат кызматы билдиргендей, иштелип чыккан система бардык тараптар үчүн, мамлекеттик жана муниципалдык кызмат ордуна талапкерлерге арналат.

«Кыргызтест» системасы өз ичине төмөнкүдөй деңгээлдерди камтыйт: элементардык деңгээл (А1), базалык деңгээл (А2), орто деңгээл (В1), ортодон жогору деңгээл (В2), жогорку деңгээл (С1).

Мыйзамга ылайык, президенттикке талапкерлер мамлекеттик тилди В2 – «ортодон жогору» деңгээлде, коммуникативдик байланыш түзө билиши керек, буга мамлекеттик тилди билүүнүн эки жогорку категориядагы деңгээли кирет.

«Кыргызтест» системасы боюнча талапкерлерди тестирлөөнү мамлекеттик тилди өнүктүрүү тармагындагы ыйгарым укуктуу орган түзгөн эксперттик комиссия өткөрөт. Төрт субтест боюнча жалпы балл «1. Лексика, грамматика, жазуу», «2. Аудирлөө», «3. Окуу», «4. Сүйлөө» эксперттик комиссия тарабынан коюлат.

«Кыргызтест» системасы эл аралык стандарттарга ылайык иштелип чыккан. Тапшыруу жараяны баалоодо адам факторун алып салуу үчүн толугу менен компьютерлештирилген.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!