Мирзиеёвдин иш сапарында чек ара келишимине кол коюлат

Мирзиеёвдин иш сапарында чек ара келишимине кол коюлат
4-Сен. 2017, Дүйшөмбү

Өзбекстандын президенти Шавкат Мирзиеёв 5-6-сентябрь күндөрү Кыргызстанга расмий иш сапары менен келет.

Бул тууралуу президенттик аппараттын тышкы саясат бөлүмүнүн жетекчиси Айзада Субакожоева журналисттер үчүн өткөрүлгөн маалымат жыйынында билдирди.

Мирзиеёвдин иш сапары учурунда эки өлкөнүн ортосундагы чек ара боюнча келишимге кол коюлат.

Аны менен бирге эки өлкөнүн мамлекет башчылары эки тараптуу кызматташтык, чек ара, Кытай-Кыргызстан-Өзбекстан темир жолун куруу сыяктуу маанилүү документтерге кол коюшат.

“Бул визит тарыхый жана кыргыз-өзбек мамилесин жаңы деңгээлге көтөрүүгө шарт түзүп, кызматташтыктын жаңы барагы ачылат. Эки өлкө ортосундагы ар тараптуу кызматташтык боюнча бир катар маселелер боюнча сүйлөшүү болот. Негизги маселе болуп чек ара тилкелерин тактоо талкууланат”,-деди Субакожоева.

Өзбекстандын президенти иш сапарынын алкагында өкмөт башчы Сапар Исаков жана Жогорку Кеңештин төрагасы Чыныбай Турсунбеков менен дагы жолугушмакчы.

Кыргыз-өзбек чек арасынын жалпы узундугу 1378 чакырым. Анын ичинен 320 чакырымы тактала элек, тагыраак айтканда талаштуу делген 58 аймак бар.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!