Бүгүн Өзбекстандын президенти келет

Бүгүн Өзбекстандын президенти келет
5-Сен. 2017, Шейшемби

Бүгүн, 5-сентябрь түштөн кийин Өзбекстандын президенти Шавкат Мирзиеёв эки күндүк иш сапары менен Кыргызстанга келет.

Президенттик аппараттын тышкы саясат бөлүмүнүн жетекчиси Айзада Субакожоева пландалган иш сапарынын алкагында эң маанилүү документ болуп эки өлкө ортосундагы чек ара боюнча өткөөл келишимге кол коюларын билдирди.

Аны менен бирге эки өлкө ортосундагы бардык тармактар боюнча кызматташуу, Кытай-Кыргызстан-Өзбекстан темир жолун куруу сыяктуу документтерге кол коюлмакчы.

Ушул жылдын 16-августунда өзбек өкмөт башчысы Абдулла Арипов Кыргызстанга иш сапары менен келип, кыргыз-өзбек чек арасынын такталган 1170 чакырым тилкесин бекитүү боюнча сүйлөшүүлөр болуп, келишимге кол коюу чечими кабыл алынган.

Өткөн жылдан бери чек араны тактоо боюнча эки мамлекеттин жумушчу топтору 16 жолу жолугушуу өткөргөнүн Айзада Субакожоева кошумчалады.

Кыргызстан менен Өзбекстандын ортосундагы чек аранын жалпы узундугу 1378 чакырымды түзөт. Анын ичинен талаштуу делген 58 аймак же болбосо 320 чакырым тактала элек.

Расмий Ташкент менен Бишкектин ортосундагы кошуналык жылуу мамиле өткон жылдын сентябрь айынан баштап жандана баштаган.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!